Volven as cámaras dixitais de principios de século
Na era da intelixencia artificial, volve o gusto polo natural, sen retoques nin manipulacións
É o espírito que hai detrás da elevada demanda das cámaras dixitais dos anos 2000, que se están revalorizando no mercado de segunda man
As que nos deixan as cámaras do cambio de século son imaxes irrepetibles. Unha instantánea no Obradoiro en que se move o fotógrafo porque non hai zoom, a praia das Catedrais sen filtros ou esa maneira de suxeitar a cámara, en horizontal e a dúas mans.
"Eu, por exemplo, emprego as dos meus pais, de cando eran novos. É un recordo de algo que usaron eles, sígoo usando eu e quedan na tradición", comenta unha moza, da denominada xeración Z.
Están volvendo as cámaras dixitais de principios do século XXI, tanto que xa se disparou o prezo no mercado de segunda man. Imos a unha tenda para comprobalo.
"Quítanchas das mans. Unha cámara que hai 2-3 anos se vendía en 15 ou 20 euros, hoxe pode chegar aos 200", confirma Jaime Álvarez, xerente da tenda Locotoo de Ourense.
O maior inconveniente son as tarxetas de memoria.
"Agora que hai móbiles de 1 ou 2 teras, nestas cámaras eran tarxetas de memoria de 64 ou 32 megas", explica Jaime.
Que é o que busca entón a xeración Z nestas cámaras máis vellas ca eles?
"Recolle mellor a imaxe. Eu penso que ten o toque 'vintage' que se leva moito agora", conclúe unha moza.
