Volve a chuvia e a sensación de bochorno á provincia de Ourense

Despois dunhas xornadas de sol e moita calor, volve a inestabilidade, a chuvia e comezan a baixar as temperaturas. Na provincia de Ourense prevíanse de novo temperaturas por riba dos 30 graos, pero xa houbo que sacar os paraugas.

A xornada comezou anubrada na cidade das Burgas. Marchou o sol e inesperadamente, xa pola mañá, veu a chuvia. Un cambio radical despois dunha semana de temperaturas moi altas. 

Unha chuvia necesaria para paliar a escaseza de auga encorada. Nesta semana as reservas na provincia baixaron un pouco máis ata situarse nun 48 % da súa capacidade, un 30 % menos que un ano hidrolóxico normal. 

Agárdase un pouco máis de auga pola tarde, que mesmo pode caer de xeito treboento. Con todo, as temperaturas seguen sendo altas e a sensación é de bochorno.