Vivendas turísticas de Santiago cancelan reservas pola ameaza de sancións do Concello

Os propietarios de vivendas de uso turístico en Compostela enfróntanse a multas de ata 15.000 euros se carecen de licenza municipal. Din que algúns xa se viron obrigados a pechar e a cancelar as reservas que tiñan para o verán.

O problema comezou despois de que o Tribunal Superior de Xustiza de Galicia ratificara que as vivendas de uso turístico son actividade económica e, polo tanto, suxeita a normativa municipal. Dende entón o Concello empezou a enviar requirimentos de peche e multas de entre 10 e 15.000 euros aos propietarios que non teñen licenza municipal.

Xa non poden operar sen ese permiso e tampouco poden obtelo, polo menos ata que se aprobe o novo PXOM. Sen alternativa, teñen que pechar, cancelar as reservas e realoxar os clientes que as tiñan. Quéixanse dos gastos e das perdas que lles supón xusto en pleno verán.

Ata agora traballaban cun título habilitante e inscritos no rexistro autonómico, pero o Tribunal Superior di que as vivendas de uso turístico son unha actividade económica e que precisan licenza municipal.

No Concello de Santiago calculan que hai arredor de 900 sen este permiso, así que os propietarios comezaron a recibir avisos de peche. 

Di os propietarios destes establecementos que o cambio de criterio só se aplica en Santiago, e dende o Concello afirman que non queren eliminar o sector, senón regulalo. 

No Concello prevén que a normativa para o sector estea lista a principios do ano que vén. Os propietarios xa anuncian que recorrerán á xustiza para defender os seus dereitos.