Vigo será sede permanente da Mesa da Ciencia Pesqueira

Vigo será a sede dunha mesa permanente da ciencia e a pesca de España, co que o Goberno trata de compensar a cidade tras deixala sen a sede do Instituto Español de Oceanografía.

Así o anunciaba este luns a ministra de Ciencia e Innovación, Diana Morant, na súa visita ao estaleiro Armón. A mesa reunirase unha vez ao ano, o primeiro encontro será en outubro, co fin de potenciar o diálogo entre a ciencia e o tecido produtivo.

“A mesa o que persegue é o diálogo entre o coñecemento e a súa aplicación por parte dos sectores produtivos, neste caso do sector pesqueiro”, explicou a ministra durante a visita ao estaleiro, onde o Ministerio de Ciencia vai construír un buque oceanográfico de 85 millóns de euros que será “o mellor buque de investigación” que teña España.

Morant, que acudiu ao estaleiro acompañada da secretaria xeral de Pesca do Ministerio de Agricultura, Pesca e Alimentación, Alicia Villauriz, e do alcalde de Vigo, Abel Caballero, subliñou que non se lle ocorría mellor lugar que a cidade galega para poñer en marcha esa mesa, que se reunirá por primeira vez en outubro coa súa presenza, e a do ministro Luís Planas.

“Que sexa Vigo a sede desta mesa é un recoñecemento científico e pesqueiro a que Vigo é a capital da ciencia oceanográfica e a capital da pesca do noso país”, dixo a ministra, que destacou que Vigo é a sede 7 dos 10 buques da frota científica de España e que “é o gran porto de España”, xa que o 50 % da frota pesqueira que faena en augas internacionais vén de Vigo.

Dous factores, dixo a ministra, que fixeron da cidade o lugar indicado para esa mesa, a cal, segundo explicou, “será un órgano colexiado, regrado, que terá unha organización con representación dos dous ministerios, que o copresidirán, pero tamén das entidades locais, das administracións autonómicas, da sociedade civil, das confrarías de pescadores, en definitiva da industria tamén da pesca”.

En principio, a mesa reunirase unha vez ao ano, pero esa periodicidade podería cambiar en función de como vaia evolucionando o seu traballo.

O obxectivo é “dialogar e poñer en valor ese coñecemento e esa ciencia para poñelo ao dispor da cidadanía, da sociedade e o sector pesqueiro”, explicou Morant.

“Non se entende o futuro sen un diálogo permanente entre a sociedade e as administracións e esta vai ser a primeira experiencia desa transferencia de coñecemento real entre a ciencia e os sectores produtivos”, engadiu antes de explicar que non será o último.

Morant lembrou que “a sustentabilidade é o eixo de acción do Goberno de España” e que é importante “ter o máximo coñecemento para podelo aplicar” de modo que “teñamos uns mares e uns océanos o máis saudables posible, para que despois sexan o máis produtivos posible”.

Pola súa banda, o alcalde de Vigo, Abel Caballero, manifestou a súa satisfacción polo anuncio da ministra, e recoñeceuse “entusiasmado” e “encantado” a pesar de que a súa esixencia é sempre moi alta.