Vigo prende as luces dun Nadal que fascina milleiros de persoas

Vigo comeza a escintilar. O alcalde da cidade prendeu o alumeado de Nadal logo da xa coñecida conta atrás en inglés, castelán e galego coa que cada ano inaugura as festas "en todo o planeta".

"Todos os satélites internacionais arredor do planeta están enfocando a Vigo. O resto do mundo xa non ten cobertura", asegurou.

Nunha Porta do Sol ateigada malia a choiva previa, Abel Caballero acendeu os case doce millóns de luces led repartidas por 460 rúas e prazas, corenta máis ca o ano pasado.

Unhas 7.000 persoas presenciaron en directo o espectáculo ao pé dunha árbore de 45 metros de altura que xa se converteu no símbolo destas festas que cada ano atraen milleiros de visitantes.

Ademais, moita xente seguiu o acendemento dende as tres pantallas xigantes instaladas na rúa Policarpo Sanz, no museo Marco e no centro comercial Vialia.

Este ano hai máis de 7.000 motivos ornamentais, 50 elementos lumínimos 3D, un belén monumental, a casa de Papá Noel, a nora xigante, unha pista de xeo e outra de karts.

Ata o domingo 11 de xaneiro, o Nadal vigués complétase cos mercados da alameda, de Vialia e de Bouzas.

Sector hostaleiro

Malia as cancelacións de última hora polo mal tempo, esta fin de semana a ocupación media supera o 80% nos hoteis da cidade. Algúns establecementos colgaron o cartel de completo.

Son datas marcadas xa como tempada alta no calendario turístico de Vigo. Un 30% de hóspedes proceden do país veciño, onde a tradición da decoración do Nadal está ben arraigada.

"Tiña visto en Internet que era moi bonito, e diferente. Nós somos tamén dunha vila con decoración de Nadal moi bonita, como é Leiría. E quixemos vir coñecer tamén como son outras vilas no Nadal", comenta un turista portugués.

"É diferente. Din que Vigo é moi coñecido a causa do Nadal, e por ese motivo estamos aquí", engade outra turista.