Renfe establece un plan alternativo por estrada tras o descarrilamento dun tren nas Neves
O accidente produciuse preto do apeadorio da estación das Neves
O convoi componse da cabeza tractora e 17 vagóns
Na tarde deste sábado descarrilou, por causas que se están a investigar, un tren de mercadorías que transportaba bobinas e que está composto pola cabeza tractora e 17 vagóns.
O maquinista quedou atordado tras o suceso e, segundo as primeiras informacións, podería estar atrapado.
Decontado, os xestores do 112 Galicia informaron do ocorrido ao Servizo de Urxencias Sanitarias de Galicia-061, aos Bombeiros de Ponteareas e á Garda Civil.
Logo de acudiren á zona, os bombeiros non chegaron a ter que intervir para liberar a persoa, pois os axentes da Garda Civil puideron acceder ata ela para acercala ata a ambulancia das urxencias sanitarias.
O suceso tivo lugar pasadas as sete da tarde.
🔴 #AXEGAInforma do descarrilamento dun tren de mercadorías nas Neves.
— 112 Galicia (@112Galicia) November 15, 2025
📍 Apeadoiro da estación.
➡️ O maquinista é o único ferido.
➡️ O #112Galicia recibiu o aviso sobre as 19:10 horas.
🚨 Urxencias Sanitarias de Galicia-061, Bombeiros de Ponteares e Garda Civil. pic.twitter.com/ZyOgAvhfzO
Tras o suceso, Renfe estableceu un plan alternativo de trasporte por estrada entre as estacións de Vigo Guixar e Ourense para trens de media e longa distancia.
Corte entre Redondela e Arcade
Por outra banda, Adif acaba de informar de que quedou suspendida a circulación ferroviaria entre Redondela e Arcade (traxecto Vigo Guixar - Santiago de Compostela). O motivo é un desprendemento de terra que non está a afectar ao corredor Atlántico.
