Vida ou morte en Turquía: o Breogán xoga o futuro europeo
O terceiro e definitivo partido diante do Karsiyaka xógase o mércores ás 18:30 e verémolo na G2 e en eventos.crtvg.gal
A aventura europea do Breogán terá outro fito este mércores. Visita a pista do Karsiyaka coa necesidade imperiosa de acadar a vitoria para continuar na Básketball Champions League. Unha derrota en Turquía significaría a eliminación.
O primeiro partido da eliminatoria acabou con vitoria do Karsiyaka por 89-85 co Breogán pelexando ata o último intre por facerse coa vitoria. O gran partido de McCollum decidiu para o equipo rival. A eliminatoria viaxou a Lugo onde o Breogán se fixo forte como local e conseguiu impoñerse cun 80-73 nun dos mellores partidos de toda a temporada.
Agora tocará repetir a boa actuación destes dous encontros pero logrando a primeira vitoria de toda a competición como visitante. Na fase de grupos tampouco logrou gañar ningún partido lonxe do Pazo.
