Venden en Ribadeo un boleto da ONCE premiado cun millón de euros

Un cliente dun coñecido restaurante do porto de Ribadeo fíxose millonario tras adquirir un boleto da ONCE. Tratábase dun Rasca Platinum, que é a última modalidade dos coñecidos como rasca e gaña.

O premio gañado resultou ser o da máxima contía, un millón de euros, que é ademais a maior cantidade repartida ata o momento neste negocio.

 "Vendémosllo a un señor, que vimos saír correndo. E logo soubemos que lle tocara un millón de euros", conta César Álvarez, encargado do restaurante.

Ao parecer, polo momento o premio aínda non foi cobrado. Tocante á identidade da persoa agraciada, que comprara un único boleto, no establecemento ribadense teñen claro que non se trata de alguén da vila.

"Vendémoslle un e tocoulle o premio á primeira. Non podemos dicir quen é porque non o sabemos. Era un turista que pasaba", di César.

Con este último, xa van catro premios repartidos na Mariña nos últimos días. En pouco máis dunha semana, a Lotería Nacional repartiu 60.000 euros en Foz, 30.000 na Pontenova e outro tanto en Burela.