Cinco persoas morren e 86 están desaparecidas tras o incendio dun barco en Filipinas

Cinco persoas morreron e 86 desapareceron por mor dun incendio rexistrado nun barco de pasaxeiros preto da illa de Coron, un importante destino turístico do oeste de Filipinas.

Na embarcación viaxaban 134 persoas, 117 pasaxeiros e 17 tripulantes. Corenta e tres foron rescatadas con vida. As súas identidades non foron reveladas ata o de agora. Polo momento, non hai constancia de españois afectados no sinistro.

O transbordador, co nome de M/V June Aster, partira o martes á noite desde Manila. Segundo o relato dun dos superviventes, o incendio comezou na zona das adegas e en cuestión de minutos estendeuse con rapidez. Nun vídeo compartido polos gardacostas na rede social Facebook pódese ver a embarcación completamente envolta en chamas.

Segundo a Garda Costeira, as operacións de busca e rescate continúan.

En xaneiro, 66 persoas morreron no naufraxio dun transbordador

Os accidentes marítimos son frecuentes en Filipinas. Cada ano custan decenas de vidas, ben por naufraxios causados polo mal tempo, ben polo incumprimento das normas de seguridade ou ben polo defectuoso mantemento dos equipos ou a sobrecarga.

O último accidente grave produciuse en xaneiro pasado, cando afundiu un transbordador en Mindanao que transportaba 350 persoas. Sesenta e seis perderon a vida.

O suceso máis grave na historia moderna da navegación comercial sucedeu en Filipinas en 1987, cando o transbordador Dona Paz perdeu o control tras chocar cun petroleiro e causou a morte de 4.341 persoas.