Veljko Mrsic seguirá a vindeira temporada no Breogán
O club e o adestrador amosaran en todo momento a disposición de prolongar o contrato
O obxectivo da permanencia está moi preto de conseguirse
Veljko Mrsic chegou a Lugo nun momento crítico. En xaneiro de 2022 aceptou o reto de substituír a Paco Olmos, que marchara cara a Burgos deixando o club de malas maneiras.
Na media temporada na que estivo cumpriu con creces os obxectivos e asinou a renovación para esta campaña. Neste 22-23, o Breogán vai camiño de certificar unha temporada máis a permanencia e estivo a piques de meterse na Copa do Rei por segundo ano consecutivo.
As dúas partes xa amosaran a boa disposición para prolongar o contrato e acaba de facerse oficial neste 9 de febreiro. Mrsic renova por unha campaña e liderará o proxecto do Breogán.
"Para traballar ben tes que estar a gusto, eu estou aquí a gusto"
"Cremos neste plantel"
Esta temporada xa tivo que asumir o rol de líder e deseñar un equipo que se renovou ao 80 %, con baixas tan importantes como as de Musa ou Mahalbasic.
