Veciños da Peregrina, en Santiago, denuncian problemas polas obras de ampliación da estrada
Sosteñen que varias casas corren risco de inundación ao quedar baixo o nivel da vía
Auguran problemas de seguridade viaria e piden medidas para calmar o tráfico
Xa van tres anos de obras nesta estrada da Peregrina e tamén de pesadelo para os veciños da parroquia. Sobre todo para os que viven nas casas que quedaron afundidas polo novo nivel da vía.
"Eu antes saía da casa e estaba a ras da estrada, agora xa ves o desnivel que colleu por culpa da obra. En canto chove catro pingas, a auga chega ao soto", conta un deles.
"Non só levantaron o nivel, tamén fixeron que a estrada verta toda a auga contra a nosa propiedade. Deixaron a estrada sen drenaxe neste lateral. É unha deficiencia da que vimos advertindo reiteradamente á dirección da obra, pero non nos fan caso", din dous veciños afectados.
Para mostra, un vídeo gravado nas últimas horas desde outra das vivendas afectadas. A Deputación da Coruña, da que depende a estrada, comprometeuse a poñer sumidoiros de reixa se o problema persiste unha vez rematada a obra. Pero os veciños están fartos de promesas.
"Agora é o momento de arranxalo, agora que están as máquinas. É un problema que xa sabemos que existe, que poñan as reixas agora e canalicen as augas pluviais, que o fagan antes de que remate a obra", demanda José Antonio Gallas, o presidente da Asociación de veciños Río Sarela.
"Cando chove todo o escombro acumulado atasca o sumidoiro. Tiraron o monólito da auga e da luz e deixaron o escombro, e as arquetas novas xa están rotas", lamenta outra veciña.
Outra das grandes preocupacións é a seguridade viaria. Ducias de camións transitan a gran velocidade pola recta, e temen que coa ampliación da vía a cousa vaia a peor. O proxecto non contempla facer beirarrúas, senón unha senda peonil que non convence os veciños. Tampouco cren que a solución sexa a instalación dun radar.
"Isto debería considerarse unha travesía urbana porque hai moita casa. Teñen que poñer pasos de peóns e lombas no asfalto que fagan que os vehículos vaian a 50, o sinal está pero non o respectan", comenta o presidente da asociación veciñal.
"Pasan moi rápido, cruzar a estrada para coller o bus na parada é imposible", engade outra afectada.
Piden tamén reforzar a sinalización na entrada da vía, xa que ese tramo vai quedar sen ampliar e pode ter un maior risco de accidentes.
