Seis mortos nos Países Baixos tras seren atropoledados por un camión español
O vehículo co logo da empresa El Mosca atropelou uns veciños que facían unha grellada nunha leira
Lugar do accidente cos servizos de emerxencia
Varias persoas faleceron este sábado na localidade holandesa de Nieuw-Beijerland -próxima a Rótterdam- ao seren atropeladas por un camión de matrícula española. O vehículo leva pintado no remolque o nome da empresa de transportes El Mosca, con sede en Murcia.
Segundo fontes policiais, pode haber polo menos seis mortos, ademais de sete feridos. O condutor, que saíu ileso e está a ser interrogado, saíuse da estrada e arroiou a un grupo de veciños que facían unha grellada nunha leira.
Ata o lugar desprazáronse unha decena de ambulancias, ademais de tres helicópteros de emerxencia. Varios feridos foron levados ao hospital. A policía explicou que hai “moitas testemuñas do ocorrido”, e que o camión deberá ser sacado do lugar do sinistro con axuda dun guindastre especializado.
O vehículo arrastrou ao seu paso a un grupo de persoas que festexaba ao aire libre. No lugar dos feitos hai cadeiras e mesas tiradas, e varias testemuñas dixeron que todo sucedeu nun momento e non saben como pasou todo. O furgón estaba na estrada e logo no medio da celebración, explicaron.
