Un incendio causa 40 mortos e 115 feridos na estación suíza de Crans Montana

Unha explosión e o incendio posterior nun bar da estación suíza de esquí de Crans Montana, no cantón de Valais, provocou 40 mortos e 115 feridos, a maioría deles moi graves.

Así o confirmou a policía do cantón de Valais na tarde deste xoves. 

"A prioridade é a medicina legal para axudarnos a identificar as persoas falecidas", indicou a procuradora xeral do cantón, Beatrice Pillourd, nunha conferencia de prensa na que a policía confirmaba un elevado número de vítimas mortais, e descartaba a hipótese dun atentado.

Varios feridos están en caso crítico e algúns dos máis graves con queimaduras moi graves serán trasladados a Alemaña, Francia e Italia, que ofreceron o seu apoio ao Goberno suízo ante esta traxedia.

Así mesmo creouse unha célula de acollida para ofrecer apoio psicolóxico ás familias e testemuñas do drama.

O incendio, moi violento segundo a Policía, produciuse tras varias explosións aproximadamente ás 1:30 da mañá, durante a festa de aninovo que se celebraba en Le Constellation, un bar da localidade, e aínda que a orixe das mesmas é descoñecido, a principal hipótese é a do accidente provocado posiblemente pola pirotecnia.

Por toda a vila había carteis indicando a prohibición de usar fogos artificiais para celebrar o paso de 2025 ao 2026. Porén, as autoridades negáronse a especular sobre as razóns do incendio á espera de ter información fidedigna e tampouco responderon a preguntas acerca de se o local cumpría coas medidas de seguridade legais.

Indicaron igualmente que é moi probable que entre as numerosas vítimas haxa varios estranxeiros, xa que Crans Montana é unha estación moi visitada polos esquiadores no período de fin de ano. De momento, non hai constancia de que poida haber españois entre os falecidos nin tampouco feridos.

O lume orixinouse sobre a unha da mañá, segundo varias testemuñas por unha bengala que prendeu no teito, e inmediatamente devorou as dúas plantas do inmoble.

A situación que se viviu foi dramática. Atrapadas entre o lume, ducias de persoas romperon os cristais para intentar saír polas ventás.