Os EUA e Irán suspenden o encontro en Suíza en medio de ataques israelís no Líbano

O Goberno suízo confirmou este venres que a reunión prevista entre os Estados Unidos, Irán e os mediadores nas negociacións para un cesamento das hostilidades, Qatar e Paquistán, está adiada. A Casa Branca alega problemas loxísticos, e Irán, os últimos ataques de Israel no Líbano.

O encontro estaba previsto para este venres na localidade alpina de Bürgenstock, onde xa se despregara un dispositivo de seguridade en previsión da chegada das delegacións.

O Ministerio de Asuntos Exteriores de Suíza indicou que, a pesar deste revés, os traballos preparatorios pertinentes en Bürgenstock continúan e que mantén toda a súa disposición a facilitar as conversacións.

Xornalistas de varios medios internacionais chegaran para intentar cubrir o evento a pesar de que as autoridades indicaran que non se prevía acceso para a prensa.

Neste complexo turístico celebrouse en 2024 o Cumio de Paz para Ucraína, ao que asistiron numerosos xefes de Goberno e delegacións de 92 países, nun esforzo por avanzar na reflexión sobre a súa reconstrución unha vez terminada a guerra con Rusia. 

Aumentan a polo menos 18 os mortos en ataques israelís contra o sur do Líbano

A cifra de mortos en ataques que Israel lanzou a madrugada deste venres contra diferentes poboacións do sur do Líbano aumentou a 18, e outras 33 persoas foron feridas, informou o Ministerio de Saúde Pública libanés, pese ao acordo alcanzado polos Estados Unidos e Irán, que fixa un cesamento de hostilidades tamén no país mediterráneo.

A acción máis sanguenta tivo lugar na poboación de Harouf, con polo menos sete mortos e dez feridos, de acordo co Centro de Operacións de Emerxencia Sanitaria, dependente do Ministerio de Saúde Pública, que indicou que se trata dun balance preliminar.

Tamén os ataques tiveron como obxectivo as poboacións de Doueir, con polo menos tres mortos, a mesma cifra que en Al Sharqiyah, á vez que en Al Qatrani e en Jesbshit perderon a vida dúas persoas e en Al Abbasiya houbo outro morto, segundo o comunicado do ministerio, que tachou os ataques israelís desde a medianoite ata a mañá deste venres como intensos, e impiden a evacuación dos falecidos e feridos.

A Axencia Nacional de Noticias (ANN) libanesa indicou que ao redor das 02:00 hora galega, ataques aéreos israelís tiveron como branco o barrio de Baydar, en Harouf; mentres que en Doueir, o obxectivo foi un edificio residencial no barrio de Al Tarbiya wal Taalem.

Doutra banda, entre os falecidos en Al Sharquiyah hai un membro da Defensa Civil, segundo informou nun comunicado a entidade, que lamentou a morte do identificado como Mahoud Jaafar Shuaib, xunto á súa familia, sen precisar a cifra, como consecuencia da agresión israelí.

Estes bombardeos prodúcense durante unhas horas nas que o grupo xiíta libanés Hezbollah reivindicou dous ataques contra tropas israelís que intentaron avanzar no sur do Líbano, no marco da súa invasión no país árabe.

Ata o momento, Israel non reaccionou ante esta información.

Estes choques teñen lugar despois de que o presidente dos Estados Unidos Donald Trump e o seu homólogo iraniano Masud Pezeshkian asinasen dixitalmente o memorando de entendemento, que entrou en vigor inmediatamente tras a rúbrica, e que estende o cesamento de hostilidades ao Líbano.

A pesar diso, o primeiro ministro de Israel Benjamin Netanyahu asegurou este xoves que o exército manterá a "zona de seguridade" nos territorios ocupados do sur do Líbano, dos que Israel non se retirará "mentres as necesidades de seguridade así o esixan".

O líder de Hezbollah Naim Qassem asegurou esta semana que o límite para as negociacións entre Israel e o Líbano debe ser a seguridade mutua, e chamou a aproveitar o acordo de paz entre Irán e os Estados Unidos para expulsar o Estado xudeu e restaurar a soberanía. 

Catro soldados israelís morren nun ataque cun dron explosivo de Hezbollah ao sur de Líbano

O exército israelí informou este venres da morte de catro dos seus soldados tras un ataque con dron explosivo por parte da milicia xiíta Hezbollah ao sur de Líbano.

"Morreron por mor do impacto dun proxectil contra un tanque no sur do Líbano", informaron as Forzas de Defensa de Israel (FDI) nun comunicado.

Por outra banda, o exército israelí indicou que durante a noite do venres, un oficial da reserva das FDI foi gravemente ferido e tres soldados, tanto da reserva como regulares, sufriron feridas leves como consecuencia doutro ataque con dron explosivo tamén ao sur de Líbano.

Pouco antes, as FDI confirmaban que continúan atacando infraestruturas de Hezbollah en diversas zonas ao sur do seu país veciño.

"As Forzas de Defensa de Israel atacaron durante toda a noite e continúan atacando terroristas e infraestruturas da organización terrorista Hezbollah en varias zonas do sur do Líbano", rezaba a devandita nota castrense.