Xunta e Aena aceptan reunirse, a proposta da Deputación de Pontevedra, polo 'Pacto por Peinador'

A Xunta de Galicia e Aena responderon favorablemente á proposta da Deputación de Pontevedra a promover un acordo institucional co reto común de captar rutas aéreas para a terminal viguesa. A vicepresidenta, Luisa Sánchez, emprazou a ambas as institucións para iniciar en setembro as reunións necesarias para impulsar o que chamou o ‘Pacto por Peinador’.

“En ambos os casos responderon con plena predisposición para sentar e trazar unha senda de recuperación en Peinador”, dixo este martes Sánchez, quen considera que os estudos de viabilidade xa analizados (París, Londres, Ámsterdam ou Milán) constitúen “un punto de partida idóneo”.

A idea é que as reunións previstas para setembro permitan concretar os seguintes pasos para a captación de novas conexións, aproveitando as achegas previstas por cada administración. Neste sentido, Sánchez destacou o compromiso da Deputación de Pontevedra de destinar 200.000 euros para promoción en orixe durante o primeiro ano por cada nova ruta aberta en Vigo.

“É unha aposta concreta, con recursos fixados e cunha meta moi clara: que Peinador teña máis e mellores conexións”, dixo Sánchez, quen recoñeceu que a recuperación da actividade do aeroporto “non será unha tarefa doada”.

A vicepresidenta da Deputación instou ao Concello de Vigo a sumarse pese ao silencio que mantivo ata o momento o alcalde.

“Os aeroportos funcionan mellor cando as administracións colaboran”, dixo Sánchez, que puxo como exemplo o caso de Santiago, onde o Concello de Santiago, Aena e a Xunta de Galicia colaboraron para captar novas rutas a través da aeroliña Wizz Air, sen subvencionar á compañía.

Pola súa banda, o Concello de Vigo respondeu nun comunicado criticando que o Partido Popular votase este mesmo ano en dous plenos municipais en contra da proposta de financiar a tres partes iguais entre Xunta, Deputación e Concello a subvención de voos ao aeroporto de Peinador.

Para o Goberno de Abel Caballero “resulta, por tanto, pouco crible que, apenas un mes despois da última negativa, a Deputación propoña agora iniciar conversacións sobre Peinador”. O Concello insiste en que “non ten sentido facer publicidade para voar de Vigo a Londres se non existe un avión que cubra esa conexión” de modo que entende que a proposta “non resolve o problema de conectividade de Peinador”.