Catro nenos moi graves e dous adultos feridos, balance do ataque con arma branca nun parque francés
O atacante é un cidadán sirio que se declarou cristián no momento de solicitar asilo en Suecia en 2013
Polo momento descoñécense os motivos desta acción
Francia sufriu oito ataques con coitelo nos últimos anos, con dez vítimas mortais
Seis persoas quedaron feridas, entre eles catro nenos pequenos, por un ataque con arma branca nun parque na cidade francesa de Annecy (sueste), anunciaron as autoridades.
O autor do ataque é un solicitante de asilo de nacionalidade siria, sen antecedentes policiais, que foi detido e está tamén ferido.
Os catro pequenos feridos por este acoitelamento están en estado moi grave, segundo informan medios locais citado á prefectura da rexión. Un helicóptero ambulancia foi necesario para a súa evacuación inmediata.
Hai ademais dous adultos feridos, un deles en estado grave. Trátase dunha persoa que estaba no lugar, amais do propio autor do ataque que sufriu lesións ao ser detido pola policía.
A Fiscalía Antiterrorista indicou que está a estudar as circunstancias do ataque antes de decidir se se fai cargo do caso.
Sirio, refuxiado e cristián
O presunto autor do apuñalamento é un cidadán sirio de 31 anos que se definiu como cristián ao solicitar asilo en Suecia e Francia.
Identificado como Abdalmasih H., este home ten estatuto de refuxiado desde 2013 en Suecia, onde casou cunha cidadá dese país e coa que ten un fillo de tres anos, segundo fontes policiais.
O atacante, detido no lugar da agresión, residía en Francia desde finais do ano pasado e non constan antecedentes policiais.
A policía está a interrogalo para determinar os motivos da súa acción. Ao ser detido levaba unha cruz e un libro cristián de oracións.
"Non hai polo momento elementos que poidan indicar que haxa una motivación terrorista", afirmou a fiscal de Annecy, Lisa Bonet-Mathis, nunha conferencia de prensa preto do lugar do ataque.
O suceso investígase como un intento de asasinato sobre seis persoas.
Segundo varias testemuñas, o autor comezou a gritar en inglés e a apuñalar repetidamente nenos pequenos nas súas cadeiras de paseo nunha zona xogos do parque infantil, mentres algúns dos adultos presentes tentaban impedirllo.
Imaxes gravadas con teléfono móbil difundidas en redes sociais mostran ao presunto autor vestido de negro con lentes de sol, barba e un pano atado na cabeza, fuxindo co puñal aínda na súa man dereita, mentres era perseguido por varias persoas.
A detención produciuse apenas catro minutos despois dos apuñalamentos, xa que a patrulla de axentes atopábase nas inmediacións.
"Ataque dunha covardía absoluta esta mañá nun parque de Annecy. Nenos e un adulto entre a vida e a morte. A nación está traumatizada", sinalou en Twitter o presidente Emmanuel Macron.
Attaque d’une lâcheté absolue ce matin dans un parc à Annecy. Des enfants et un adulte sont entre la vie et la mort. La Nation est sous le choc. Nos pensées les accompagnent ainsi que leurs familles et les secours mobilisés.
— Emmanuel Macron (@EmmanuelMacron) June 8, 2023
"O individuo foi detido grazas á intervención moi rápida das forzas da orde", sinalou o ministro do Interior, Gérald Darmanin, en Twitter.
Darmanin e a primeira ministra, Élisabeth Borne, desprazáronse inmediatamente á zona.
O ataque ocorreu contra as oito da mañá en Annecy, unha cidade de turismo de montaña ao pé dos Alpes, en concreto no Xardín de Europa, unha ampla área aberta de praderías e bosques cun lago que se usa para o remo e outras actividades de lecer.
