Varias zonas de Galicia estarán este domingo en alerta máxima por altas temperaturas

A Xunta de Galicia informou de que este domingo activarase o nivel vermello de alerta por altas temperaturas, o máximo existente e equivalente a un risco extremo, en varias zonas da comunidade.

En concreto, segundo detalla a administración autonómica , aplicarase en áreas do interior da Coruña, o centro de Lugo, lugares de montaña desta provincia e da de Ourense e en localidades do interior de Pontevedra.

Segundo as predicións existentes, superaranse os 34 graos en boa parte do territorio da comunidade, con excepción do litoral, e rozaranse os 40 en zonas do sur de Lugo e ao redor da cidade de Ourense.

Por mor da alerta polas condicións meteorolóxicas quedará suspendida a actividade deportiva federada e do programa Xogade no exterior entre as doce do mediodía e as oito da tarde.

Nos municipios costeiros, as actividades náuticas ou acuáticas non se verán afectadas por estas restricións, aínda en caso de alerta laranxa; mentres que nos de interior estarán permitidas, pero recoméndase non realizalas nas horas centrais do día.

Alén dos lugares nos que estará activa a alerta máxima, haberá zonas do noroeste da Coruña, do sur de Lugo e de Valdeorras en nivel dous, laranxa; e A Mariña, o centro de Lugo, o noroeste de Ourense, o val fluvial do Miño e a parte meridional desta última provincia permanecerán no un, amarelo.

Este episodio de altas temperaturas, coincidente coa chegada do verán, é debido ás altas presións situadas ao norte da Península Ibérica que provocaron a chegada dunha masa de aire moi cálido desde o norte de África.

A previsión é que os seus efectos se fagan notar ata o vindeiro mércores, polo que a Xunta chama á prevención e a seguir as recomendacións existentes para evitar posibles efectos adversos sobre a saúde.

Os principais grupos de risco nestas situacións son as persoas maiores de 65 anos, menores de catro e, especialmente, as menores dun ano; así como as que padecen patoloxías crónicas, cardiovasculares, pulmonares ou similares.

Entre os consellos da administración autonómica están a hidratación constante, evitar as bebidas quentes e as comidas copiosas, aumentar o consumo de verduras e froitas, empregar roupa con tecidos naturais, utilizar protección como chapeus, lentes de sol e crema protectora ou permanecer en espazos ventilados ou acondicionados.