Catro feridos, entre eles un menor, no incendio dun edificio de Ferrol
Os catro feridos, entre eles un bombeiro, foron trasladados ao Hospital Arquitecto Marcide, dous deles en estado grave
As fortes ventadas dificultaron a extinción do lume
.png)
Catro persoas, entre elas un bombeiro, resultaron feridas este xoves por mor dun incendio rexistrado nunha vivenda de Ferrol, na que ardeu por completo un dos seus cuartos, informou a Axencia Galega de Emerxencias.
O departamento autonómico precisou que os catro afectados foron evacuados do edificio, situado no número 7 da rúa Álvarez de Sotomayor, no barrio de Recimil, e indicou que toda a casa resultou danada polo lume, ademais dunha contigua.
O incidente motivou un despregamento de Urxencias Sanitarias de Galicia-061, Policía Local de Ferrol, Policía Nacional e os servizos municipais contraincendios de Ferrol e do veciño concello de Narón.
O suceso sobreveu ao redor das 05:40 horas na contorna do mercado de abastos do barrio de Recimil, de titularidade municipal e que coas súas máis de mil vivendas é un dos maiores parques inmobiliarios públicos de España, unha zona que foi acordoada para facilitar as tarefas do persoal de emerxencias desprazado ao momento.
Os catro feridos foron trasladados ao Hospital Arquitecto Marcide, dous deles en estado grave. Entre os afectados, hai un membro do equipo de extinción
As fortes ventadas dificultaron a extinción do lume. A Policía Científica está a investigar as causas deste incendio.
