Veciños de Fene denuncian que teñen que cruzar a vía do tren a diario para acceder aos seus terreos
Fixeron un vídeo a modo de denuncia sobre a perigosa situación que viven diariamente. Este acumula xa máis de 1.000 compartidos nas redes sociais.
Apuntan que levan dende o ano 2.000 loitando por esta situación
O Concello incide en que non ten competencias na materia, que son leiras particulares e que nunca houbo un camiño público
Uns veciños de Fene fixeron un vídeo denunciando que levan máis de 20 anos coa obriga diaria de ter que atravesar as vías do tren para acceder aos seus terreos.
"Non temos seguridade ningunha. Os nosos pais son maiores, baixan con bastóns, ás veces teñen caído ao chan e téñense desmaiado e, se lles pasa algo, aquí non pode entrar ninguén, ningunha ambulancia", comenta unha das veciñas.
Os veciños comentan que é unha situación de extremo risco e que as súas vidas corren perigo cada vez que cruzan estas vías. Apuntan, ademais, que xa levan varios sustos enriba do corpo.
"Unha vez viña eu cunha carretilla cargada de cemento, cando xa non estaban os camiños, e no medio da vía vexo o tren. Tirei a carretilla e pasoume rozando. Tamén matou a un veciño meu que vivía aquí cerca", conta outro veciño.
Contan que antigamente había un paso a nivel e camiños que daban servizo ao seu terreo e a nove máis, pero que, pouco a pouco, fóronse pechando.
"Esas servidumes foron pechándose, presuntamente por veciños. Cara a un lado está o camiño público antigo, tamén pechado, e cara ao outro, as servidumes", afirma a primeira veciña.
Dende o Concello inciden en que non teñen competencias na materia, que son leiras particulares e que nunca houbo un camiño público. Din que teñen que acceder a través servidumes de paso porque sempre foron terreos de labradío.
