Arrinca a operación retorno, con máis de 5 millóns de desprazamento

A operación retorno tras as vacacións de verán empeza este venres pola tarde, cando a Dirección Xeral de Tráfico (DXT) prevé máis de 5 millóns de desprazamentos en España, entre quen volve ás súas casas e os que, en cambio, comezan as súas vacacións en setembro.

Desde o inicio desta operación especial de Tráfico e ata a medianoite do domingo, último de agosto, van intensificar as medidas de vixilancia e seguridade con controis de velocidade por radar fixo e móbil, drons, cámaras de vixilancia e motos camufladas, entre outras medidas.

Ademais, aínda que a previsión é que os movementos se produzan de forma graduada, nas zonas máis conflitivas van instalar carrís reversibles e, para facilitar a circulación, restrinxíronse as obras, a celebración de eventos deportivos que afecten as estradas, ademais do acceso en certos tramos e horarios a camións de mercadorías.

Na xornada deste venres, e entre as 16:00 e 22:00 horas, a DXT espera importantes movementos e problemas de circulación, tanto en sentido de saída das grandes cidades, como nas principais vías de acceso ás zonas turísticas de costa.

Continuarán as estradas da mesma maneira o sábado pola mañá, especialmente entre as 9:00 e as 13:00 horas, mentres que pola tarde agárdanse sobre todo os desprazamentos de volta ás urbes, polo que nalgúns eixos viarios haberá unha grande afluencia de vehículos.

No último día da operación, o domingo 31, a maior complicación tamén se prevé pola mañá nas zonas costeiras, e pola tarde, a partir das 16:00 e ata as 23:00 horas, desde o litoral cara ás grandes cidades polo retorno de quen finaliza as vacacións e dos que viaxan a fin de semana.

Ante o inicio do novo curso, tamén se espera desde este venres unha grande afluencia nos principais eixos e pasos fronteirizos por parte de vehículos estranxeiros que regresan cara aos países europeos onde teñen a súa residencia habitual.