Uns veciños de Arteixo reciben protestas anónimas polo canto dun galo

O galo en Arteixo ten tradición e cada Nadal celébrase unha feira dedicada a esta ave. Pero hai un en concreto que se tornou viral estes días. O seu canto vespertino non deixa durmir a algún veciño que envía anónimos e increpa a berros de madrugada os propietarios do animal.

O galo da discordia, coma todos os da súa especie, canta cando se achegan as primeiras luces do día. 

"Hoxe cantou ás sete, pero o primeiro canto que lle escoitan é arredor das seis da mañá", di o seu dono León Santamaría.  

Vive nunha casa do barrio da Baiuca. Unha zona primitivamente rural onde se foron construíndo edificios. E nun deses inmobles vive algún veciño ao que incomoda o canto do galo.

"Eu durmo a escasos metros e non me desperta ningún día", di León. 

O veciño, moi  molesto con este espertador non solicitado, deixoulles un anónimo na porta en que se queixa de que o canto se escoita máis no edificio que na rúa e di que xa basta de galo. Antes de recibir esta misiva, León tiña tres galos.

"Ao recibir a nota, collín medo e matei os dous máis grandes".

Pero as protestas continúan. Pétanlle na porta e reciben berros dende a rúa. Cambiaron o timbre por un videoporteiro por se poden identificar a persoa das queixas anónimas, e están decididos a manter o galo no curral.