Unha muller leva catro anos ocupando o piso da súa exsogra

Catro anos sen pagar alugueiro nin as facturas da luz e a auga. Isto é o que está a sufrir a propietaria dun piso en Sada. A muller que ocupa o seu piso é a exparella do seu fillo e o mal mantemento da vivenda provoca inundacións e estragos nun local comercial situado no baixo do edificio. Uns gastos aos que tamén debe facer fronte a dona do piso, que cualifica a situación de insostible.

"Reclámanme máis de 7.400 euros"

Despois de romper a relación sentimental, a muller seguiu vivindo no piso e catro anos despois continúa nel sen pagar alugueiro, pero tampouco as facturas, como a da luz que debe máis de 900 euros.

"A luz non se paga, a auga non se paga e a peiteadora de abaixo tivo un problema por caerlle auga e reclámanme máis de 7.400 euros", lamenta Lula Márquez, a dona da vivenda, da que segue a pagar a hipoteca. "Amais do dano moral e psicolóxico, porque isto a min xa me ten aburrida" di.

Aínda que nun primeiro momento lle deu unha marxe para atopar outra vivenda, Lula ao final denunciou o caso no 2020 e a sentenza favorable indicaba que a muller tiña de prazo para abandonar a casa de forma voluntaria ata o 19 de xaneiro. Pero non o fixo.

"Tivemos que presentar escrito de novo ao xulgado para comunicar que non marchara e agora hai agardar a que a desaloxen" indica.

O mal mantemento da vivenda tamén lle está a ocasionar problemas no local comercial situado no baixo do edificio. Inundacións e estragos aos que debe facer fronte tamén Lula.

"Inundou unha parte, o seguro arranxou o chan e o teito e aos dous meses de estar amañado, outra fuga", explica Rosana Vialta, a propietaria do salón de peiteados. Unha fuga que provoca o mal estado da terraza da vivenda. 

Estragos e tamén perdas económicas por produtos de peitear que quedaron inservibles. En total, entre as dúas avarías superaron os 9.000 euros, pero amais provocoulle que unha parte do local non o poida empregar, pois segue a ter filtracións de auga.

"Esta semana estiven a punto de ter que pechar porque se cae auga enriba dos clientes non podo traballar", indica. 

Segundo Lula e Rosana, a muller que ocupa o piso está en situación de vulnerabilidade e parece que recibe unha axuda do Concello de Sada. Asuntos Sociais, pola súa banda, prefire non facer declaracións, ao tratarse dun caso xudicializado.