A Garda Civil intervén 3,2 toneladas de sardiñas ilegais en Portonovo
O peixe estaba sen documentar e foi interceptado na véspera do San Xoán
Os responsables enfróntanse a multas de entre 301 a 60.000 euros
Foto: Garda Civil
O Seprona de Pontevedra localizou esta semana en Portonovo un transporte con máis de 8,2 toneladas de sardiña, das cales 3,2 toneladas estaban sen documentar, ademais de superar a cota permitida.
Os axentes realizaron na madrugada do pasado martes, véspera de san Xoán, un operativo especial en distintos portos da provincia de Pontevedra para o control de actividades pesqueiras. Contaron coa colaboración de Gardacostas.
Segundo informou a Garda Civil, ao haber unha discrepancia "tan masiva" no transporte, de 3 toneladas sen rexistrar, "pódese asumir que ese peixe procede de capturas non declaradas ou ilegais".
De acordo coa escala de sancións graves, a multa pode oscilar entre os 301 e os 60.000 euros. Ademais da multa económica, a Lei de Pesca de Galicia estipula medidas adicionais para este tipo de infraccións graves, como é o comiso dos produtos obtidos ilegalmente.
