Unha muller falece electrocutada tras caer nun pozo en Vigo

Morre electrocutada unha muller en Vigo tras caer a un pozo. Aínda que trataron de reanimala, nada se puido facer por salvarlle a vida.

O 112 Galicia tivo constancia do suceso dez minutos antes das 18:00 horas da tarde deste mércores.

O persoal de Urxencias Sanitarias de Galicia-061 pedía axuda para sacar a unha muller que caera a un pozo e que non podían sacar porque estaba electrocutada, en Camino da Devesa, Saiáns, Vigo.

Neses intres, un particular comunicaba aos xestores de emerxencias que a muller xa fora retirada do interior do pozo e que a estaban reanimando.

Segundo indicaron os axentes da Policía Nacional ao 112 Galicia, todo parece indicar que a muller realizaba tarefas de limpeza no pozo cando caeu sobre o botón do sistema automático de subida e baixada do caldeiro, recibiu unha descarga eléctrica que lle provocou o falecemento.