Á prisión un home por tentativa de homicidio tras agredir cunha pedra outro home en Santiago

 O xuíz decreta o ingreso en prisión dun home detido en Santiago por un suposto delito de tentativa de homicidio.

A agresión ocorreu o pasado domingo na contorna do río Sarela.

Segundo fontes policiais, o detido discutiu coa vítima, que nese momento paseaba o seu can polo paseo fluvial, e acabou agredíndoa cunha pedra na cabeza.

Isto provocoulle feridas graves e permanece ingresada no hospital desde entón.

Por mor destes feitos, o home pasou a disposición xudicial este mércores.

Foi o Xulgado de Instrución número 1 de Santiago de Compostela o que decretou o seu ingreso en prisión.