Un incendio calcina unha nave de carpintería naval no Grove
Na instalación acumulábanse materiais para fabricar embarcacións de fibra que arderon por completo e en pouco tempo
Un incendio calcinou por completo as instalacións dunha nave de carpintería naval situada no lugar de Bizocas, no concello do Grove.
Segundo informou o CIAE 112 Galicia, foron varios os particulares que alertaron do suceso contra a 1:00 da madrugada e explicaron que as chamas podían verse desde distintos puntos da parroquia de San Vicente do Mar.
Ante iso e por se o incendio comprometía a contorna rural, aos Bombeiros de Ribadumia e ao servizo municipal de Protección Civil sumouse o persoal do distrito forestal da zona.
No interior da instalación había acumulados diversos materiais para a fabricación de embarcacións de fibra que as chamas calcinaron por completo, sen causar danos na poboación nin na contorna rural.
En canto ás naves lindeiras, os Bombeiros de Ribadumia explicaron que unha resultou afectada polo fume, pero de forma leve.
