Veciños aseguran que unha liña de alta tensión ameaza unha casa de Mos

Un veciño de Sanguiñeda, en Mos, vive atemorizado desde que un operario dunha empresa de construción faleceu na súa casa ao chocar cun cable de media e alta tensión que hai a menos de dous metros de altura do teito da vivenda.

Agora teme teme que volva a pasar cando veñan rematar a cubrición ou se cae algún poste próximo e o tendido remata sobre persoas e casas.

Jesús contratou unha coñecida empresa de Ponteareas para reconstruír o tellado na súa casa de Sanguiñeda en Mos. A empresa subcontratou traballadores, e por causas que se están a investigar un deles resultou electrocutado pola proximidade do cable de alta tensión e acabou falecendo no hospital. A familia de Jesús e os veciños acabaron fondamente impresionados e queren saber qué ocorreu e evitar un próximo incidente.

Garda Civil e Inspección de Traballo investigan e Jesús non desbota poñer unha denuncia nos xulgados. Tamén alertou por email a Naturgy pero só recibíu un acuse de recibo. Di que non se volveron poñer en contacto con el.

O propietario do inmoble e a construtora paralizaron a obra e queren saber se o tendido de alta ou media tensión próximo á vivenda cumpre a legalidade, se está a distancia e altura que esixe a normativa e canta potencia ten.

Temen ademais que caia un dos postes próximos en que adoita haber accidentes e que o cable acabe caendo sobre eles ou as súas casas con fatais consecuencias.