Unha casa en ruínas pon en perigo os fregueses de San Xoán en Ferrol

Os veciños din que levan anos loitando para que estes edificios que agora están baleiros teñan algún uso. Aseguran que un dos principais atrancos que teñen é que están especialmente protexidos por Patrimonio, polo que quen se faga cargo deles vai ter que respectar as fachadas e non lles pode dar calquera uso.

Urxen o Concello de Ferrol a derrubar unha casa en ruínas situada en fronte a igrexa da parroquia. Levan anos insistindo na necesidade de que se tomen medidas con ese inmoble, máis aló de pechar as fiestras e portas que se acometeu hai algún tempo. Aseguran que as construcións levan embargadas anos, e que o dono actual, dadas as limitacións urbanísticas da zona está disposto a facer un prezo especial se se dedica a fins sociais. 

Na oferta inclúen varias propiedades lindeiras que fan un total de dous mil metros cadrados. Na asociación queren, que aproveitando esta rebaixa no prezo, o concello compre a leira e despois se constrúa un local xa que o existente está saturado.

Andrés Medín, presidente da Asociación de Veciños San Xoán-Bretón, di que "aquí caeu o tellado estando os nenos dentro, despois caeu o primeiro andar e que coa cantidade de xente que ven a igrexa, as misas, as comuñóns, que se arrima a xente a parede, vai caer a causar algún dano".

Medín afirma que o barrio é de nove mil persoas, "somos catrocentos socios e o centro social ten cen metros cadrados. Temos capacidade para 80 persoas. Temos moitas actividades, estamos abertos os sete días da semana, incluso a fin de semana facemos bailes para maiores, e non podemos atender a todos. Hai listaxe de espera e mesmo hai xente que está a quedar fóra".

O inmoble data de 1930. En 2018 un informe de Urbanismo ordenou a demolición ou rehabilitación integral do edificio. A orde non foi atendida. En setembro do 2019 declarouse a ruína técnica da casa.