Un tornado deixa numerosos estragos en Cambados

Un tornado deixou este mércores numerosos estragos no lugar do Couto de Abaixo, na parroquia de Castrelo, en Cambados. 

Segundo informan os Servizos de Emerxencias deste concello do Salnés o paso deste fenómeno meteorolóxico provocou danos nunhas dez vivendas e unha nave.

O rastro do paso deste tornado é visible en toda a aldea. Amais de tellados que saíron voando, tamén derrubou o muro dunha propiedade.

Os colectores do lixo foron arrastrados pola forza do vento e quedaron esparexidos.

Por fortuna non hai que lamentar danos persoais.