Un sismo fronte á costa sacode o norte da Coruña e de Lugo
O movemento sísmico, de 4,4 graos, tivo lugar ás 6:32 horas
O epicentro foi a 70 quilómetros do cabo Ortegal
Eran as 6 e 32 minutos cando a terra comezou a tremer. Un terremoto de 4,4 graos sacudía varias comarcas do norte de Galicia.
O sismo tivo o seu epicentro en mar aberto, a unhas 29 millas do cabo Ortegal e a unha profundidade de dez quilómetros; non provocou danos, pero si espertou moitos veciños da Mariña lucense.
O tremor provocou algún sobresalto tamén nas comarcas de Ferrolterra, O Eume e Ortegal e deixouse sentir na Coruña e arredores.
O sismo chegou a lugares máis afastados da costa como as cidades de Lugo e Santiago e tivo unha réplica, 20 minutos despois, de 2,3 graos pero que foi case imperceptible en terra.
O tremor na Mariña
Segundo os datos do Instituto Xeográfico Nacional, rexistrouse a uns 80 quilómetros de Viveiro e a uns dez quilómetros de profundidade. Nas oficinas dos equipos de emerxencia da comarca saltaban as alertas e desde ese momento os teléfonos non pararon de soar.
Os veciños chamaban preocupados porque o tremor, aínda que durou poucos segundos, foi intenso. De feito tamen se deixou sentir noutras zonas da provincia coma a tamén na Terra Chá e na zona centro, onde os veciños tamen espertaban coa vibración.
Hai dous días rexistrábase outro sismo moi preto do epicentro do de hoxe, pero foi de pouca intensidade, 2,4, e pasou desapercibido para os cidadáns.
Tremor na provincia da Coruña
O epicentro situouse no mar Cantábrico, a unha profundidade de 10 quilómetros, e deixouse sentir en Ferrolterra, A Coruña e a súa comarca. Sada, por exemplo, foi un dos lugares onde se notou con máis intensidade. Aquí, moitos espertaron co movemento.
E outros decatáronse do que pasaba grazas ás súas mascotas. O movemento sísmico durou escasos segundos e causou distintas sensacións entre os que o percibiron.
Tamén no polígono industrial da Grela, na Coruña, notárono ben. Os clientes deste hotel non daban creto.
O tremor de magnitude 4,4 notouse contra as 6:32 da mañá. Media hora despois, o Instituto Xeográfico Nacional rexistraba unha réplica na mesma zona, pero de menor magnitude, de 2,3.
