Un surtidor de Ribadeo deu gasóleo en vez de gasolina durante cinco horas

Durante máis de cinco horas, entre a unha e as cinco da tarde do sábado, un surtidor dunha gasolineira das aforas de Ribadeo deu gasóleo no canto de gasolina 95. Segundo a empresa afectada, un erro no abastacemento que reciben foi a causa do acontecido.

Aínda que se poden producir avarías no motor, sinalan que o normal é que os vehículos paren e que sexa preciso limpar o depósito. Os problemas adoitan ser máis graves no caso das motos, e xusto ese día había unha concentración moteira.

"Houbo varios afectados. Por sorte, a gasolineira axiña avisou e atendeu a xente. É dicir, que está encarrilada a reparación dos danos", sinala Pedro Peláez, membro do Motoclub Al Corte. 

"A fin de semana foi de tolos. Chamaron xa o domingo á mañá, e debemos de recoller, só nosoutros, sobre oito motos e dous coches", afirma Armando Rodríguez, xerente do taller Porta Norte de Ribadeo. 

Ademais de pedir desculpas polas molestias, dende a gasolineira ribandese asumen toda a responsabilidade das avarías xeradas. A tal efecto, lémbranlle á clientela que debe darlle parte ao seguro e cubrir un formulario ou chamalos directamente.

"O que fixemos foi habilitar unha páxina para que metan os seus datos aí rapidamente e podermos contestarlles de forma moito máis áxil, en lugar de por teléfono. Se poden, que accedan a incidencias.gasoleosabelleira.com", explica César López Abelleira, xerente da gasolineira. 

"Hai moitos casos. É certo que o período de tempo no que se deu a incidencia é relativamente curto, pero estamos no verán, hai moitos vehículos que pasan polas gasolineiras e é certo que hai moitas incidencias. Váiselles dar resposta a todas. Púxose á súa disposición todos os servizos do seguro da gasolineira. Polo tanto, esperar a que pasen os prazos e que se resolva canto antes", engade Jesús Pérez Prada, xerente da asociación de empresarios ACISA de Ribadeo. 

"Xa marcharon algúns no guindastre e xa se puxeron en contacto coa gasolineira. En principio, a avaría que teñan, que esperemos que non sexa moita", conclúe Pedro Peláez. 

No caso de carecer do tícket de pagamento, dende a gasolineira indican que non supón problema ningún, posto que poden identificar todos os vehículos a través das cámaras.