Un peregrino ten o impacto de máis de dous turistas convencionais en Galicia
Cada euro que gastan repercute máis na nosa economía e xera máis emprego e riqueza
O impacto que produce o gasto dun peregrino multiplica por máis de dous o doutro tipo de turistas que nos visitan.
Os peregrinos, ademais de fixar poboación, xeran máis riqueza e máis emprego a escala local.
Isto é así porque os seus gastos descontan o transporte e céntranse no aloxamento e na restauración, que son negocios que teñen máis arrastre sobre outros sectores do tecido produtivo.
Non estamos falando dun gasto medio maior ca o doutros turistas, pero si de algo máis difícil de percibir a simple vista e que por iso ás veces xera a falsa crenza de que os peregrinos gastan poucos cartos en comparación con outra clase de viaxeiros.
O impacto dos seus euros gastados, de media entre 40 e 70 ao día, é maior para a nosa economía.
Os peregrinos non gastan en transporte, pero o 60 % aproximadamente do seu presuposto gástano en restauración, fronte ao 25 % dun turista convencional.
Os peregrinos levan actividade económica a zonas onde moitas veces non hai outras moitas actividades.
O estudo elaborado por Turismo de Galicia cifra no 2,3 % o peso do Camiño no gasto turístico da comunidade autónoma, aínda que o traslado á economía galega é moito maior en termos cualitativos.
