Un laboratorio de Lugo desenvolve un método para detectar micotoxinas no gando vivo
A nova técnica analiza o sangue, pero agardan obter resultados tamén no leite ou na urina
O perigo invisible para a saúde do gando que supoñen as micotoxinas víñase detectando mediante a análise do penso ou da forraxe. Son substancias tóxicas producidas por certos tipos de fungos, que poden dar lugar a trastornos gastrointestinais.
Agora, froito da colaboración entre un laboratorio de Lugo e outro de Zaragoza, desenvolveron un método que permite comprobar se os animais inxeriron este tipo de toxinas.
Mediante unha simple mostra de sangue, pódense detectar ata unha quincena de micotoxinas. A partir do soro ou do plasma dun animal, o novo método permite analizar a presenza destas substancias tóxicas no seu organismo.
Soraya Lolo, responsable do laboratorio de toxicoloxía veterinaria AMSvet: "A novidade deste método é podelo facer no animal vivo, rastrexando en tempo real tanto as micotoxinas coma os seus metabolitos para poder tomar decisións na propia explotación".
Con todo, os laboratorios que crearon o novo método seguen a traballar no desenvolvemento das súas posibilidades. De feito, contan con poder chegar a detectar tamén as micotoxinas a partir de mostras de leite, de urina ou de diversos órganos.
Soraya Lolo, responsable do laboratorio de toxicoloxía veterinaria AMSvet: "Estamos a traballar noutras matrices, coma o fígado ou os riles, para extraerlles as toxinas e analizalas tamén a través dunha cromatografía de alta presión acoplada a un detector de masas".
Ademais de poñer en risco o benestar dos animais, as micotoxinas poden facer que diminúa significativamente a súa produción, polo que o novo método para a detección temperá destas substancias poderá axudar a aforrar custos.
