Un informe pericial revela que o escritor chileno Pablo Neruda foi envelenado
A familia sostén que o réxime de Pinochet o asasinou doce días despois do golpe de estado
Peritos internacionais revelarán o mércores que a bacteria atopada nos restos do Nobel chileno Pablo Neruda "estaba no seu corpo no momento da morte", o cal demostraría que foi "envelenado" doce días despois do golpe militar de 1973, adiantou a súa familia a EFE en exclusiva.
"Sabemos agora que o 'clostridium botulinum' non tería por que estar na osamenta de Neruda. Que quere dicir isto? Que Neruda foi asasinado, houbo intervención no ano 1973 de axentes do Estado", dixo Rodolfo Reyes, sobriño do poeta.
A bacteria, responsable do botulismo, foi atopada en 2017 nunha moa de Neruda por outro panel de expertos, que desestimou a versión da ditadura e rexeitou que a causa da morte fose o cancro de próstata avanzado que o afectaba desde 1969.
