Restablécese a circulación de trens entre Monforte e Ourense despois de extinguirse o incendio de Pantón
Restablécese a circulación de trens entre Monforte e Ourense despois de extinguirse o incendio de Pantón
Podería tratarse dunha "reprodución" do incendio que afectou o mes pasado a Pantón, e que xa obrigara a cortar a circulación
Traballaron nas tarefas de extinción un helicóptero, unha motobomba, dúas brigadas e un axente
Imaxe de arquivo dun convoi de Renfe
Volven circular os trens entre Monforte e Ourense ao quedar sufocado o incendio que ameazaba as vías preto no concello de Pantón.
"Debido a un incendio próximo ás vías na zona de San Estevo-Os Peares, a circulación de trens entre Lugo e Ourense tivo que interromperse este xoves por corte de tensión na catenaria, a pedimento de bombeiros" anunciaba o Adif en X a primeira hora da tarde.
Debido a un incendio próximo a las vías, la circulación de trenes entre Lugo y Ourense se encuentra interrumpida por corte de tensión en catenaria, a petición de bomberos.
— INFOAdif (@InfoAdif) October 9, 2025
Este incendio foi unha "posible reprodución" do que afectou o mes pasado a Pantón. Comezou ás 13,18 horas deste xoves. Segundo informou a Consellería do Medio Rural, calcinou menos dunha hectárea, aínda que se iniciou nunha ladeira de difícil acceso.
Traballaron nas tarefas de extinción un helicóptero, unha motobomba, dúas brigadas e un axente.
Transporte por estrada
Ante esta situación, Renfe puxo en marcha durante a tarde un plan de transporte por estrada para prestar servizo aos viaxeiros de media e longa distancia afectados por este suceso. Ás 14:41 foi suspendido xa a saída do tren que tiña que partir de Lugo cara a Ourense.
