Un incendio de tres hectáreas entre Vilanova e Cambados ameaza unha vivenda

Un incendio forestal, no límite entre Vilanova de Arousa e Cambados, ameaza unha vivenda nun piñeiral nesta tarde de xoves.

O alcalde de Vilanova sinala que o forte vento complica os labores de extinción. "Parece que baixou a intensidade" do lume, relata, "pero co vento non se pode dicir nada".

A gran columna de fume negro que provoca é visible desde varios puntos da ría.

Pola súa banda, a Consellería do Medio Rural descarta polo momento decretar a Situación 2 ao considerar que non hai vivendas "en risco".

O lume iniciouse sobre as 17.45 horas deste xoves en Deiro, Vilanova, cunha extensión provisional dunhas tres hectáreas. Traballan tres helicópteros, dous avións, catro motobombas, cinco brigadas e dous axentes, entre outros medios.

Incendio en Castro de Rei

Por outra banda, declarouse tamén un incendio no municipio de Castro de Rei (Lugo), na parroquia de Quintela, ás 15.14 horas deste xoves.

Medio Rural informa de que está estabilizado desde as 18.34 horas. Entre outros medios, actúan catro helicópteros, dous avións, cinco motobombas e oito brigadas.

O Ministerio para a Transición Ecolóxica e o Reto Demográfico (Miteco) informa de que envía medios a este incendio en Castro de Rei, sobre o cal Medio Rural non ten estimación de superficie polo momento.