Un iate e varias nasas arden no porto de Cangas
Segundo parece, o lume iniciouse nas artes de pesca e alcanzou a embarcación cando trataban de remolcala para apartala da zona
Un iate e varias nasas arderon nun incendio rexistrado este xoves no peirao de Vilariño, no concello de Cangas. Unha persoa sufriu queimaduras nunha man, pero acudiu polos seus medios para recibir atención sanitaria.
Segundo informa o 112 Galicia, ocorreu sobre as 10:30 horas. Nun primeiro momento, varios particulares chamaban para avisar dun lume que afectaba a varias nasas, pero aos poucos minutos outros alertadores indicaban que as chamas alcanzaran a embarcación, que estaba a ser remolcada para afastala.
Seguidamente, a central de emerxencias pasou o aviso a Salvamento Marítimo, a Gardacostas, aos bombeiros de Ribadumia e do Porriño, á Garda Civil, á Policía Local e a Protección Civil de Cangas.
O incendio era de considerable intensidade, e a fumareda visible a varios quilómetros. Ademais, a Policía Local advertiu que o vento podía facilitar a súa propagación a outros barcos da contorna.
Con todo, a intervención de medios marítimos e terrestres permitiu confinar o lume para que non se estendese máis aló das nasas e o iate.
Os bombeiros traballan desde o peirao para controlar o incendio, mentres que por mar participan no operativo as embarcacións Punta Roncadoira e Irmáns García Nodal, do Servizo de Gardacostas.
