Arden en Pontevedra catro coches que agardaban o despezamento
Os coches estaban almacenados na antiga parcela de Fenosa
O Concello prevé instalar nesa propiedade a futura sede Emerxencias
Un vehículo ardeu e o lume alcanzou outros tres nunha parcela que o Concello de Pontevedra usa como espazo de almacenamento dos coches que agardan ser despezados, a carón do depósito municipal. Avisaron os bombeiros pouco despois das nove da noite e as lapas quedaron sufocadas contra as dez.
A parcela linda co cemiterio de Santo Amaro, e precisamente fronte á entrada dos vehículos fúnebres hai un buraco polo que se poden coar persoas na propiedade. A enorme cantidade de maleza impide ver gran parte do interior da parcela. Os que viven máis preto perciben movemento nesta contorna.
Esta propiedade ten cinco naves que eran de Fenosa, catro de uso industrial e unha de oficinas. Agora, o Concello de Pontevedra planifica trasladar aquí a futura sede de Emerxencias.
