Intervidos 1.300 quilos de cocaína en Cádiz nun portacontedores que facía a ruta Vigo-Málaga
O barco transportaba en total 38 fardos de cocaína na baía de Cádiz
A Garda Civil segue coa inspección polas grandes dimensións do barco
Europa Press / Garda Civil
A Garda Civil interviu 38 fardos de cocaína, cun peso total aproximado de 1.300 quilos, nun portacontedores a 40 millas da baía de Cádiz. O barco realizaba a ruta Vigo-Málaga. A embarcación escoltouse ata o porto de Cádiz.
Segundo a Garda Civil, a intervención realizouse en canto tiveron coñecemento da traxectoria do buque portacontedores, do que xa se sospeitaba que podía levar cocaína.
Tamén descubriron que o buque fora asaltado por polisóns en mar aberto, que tiñan o obxectivo de extraer os fardos e depositalos noutra embarcación.
Ao localizar o buque a 40 millas da baía de Cádiz, a Garda Civil escoltouno e, unha vez atracado no porto, iniciouse un dispositivo policial para inspeccionar de maneira minuciosa o barco. Os fardos atopáronse na cuberta superior.
A investigación continúa este xoves polas grandes dimensións do barco.
