Un garda civil de Ferrol asasina á súa exparella, tamén axente, e morre por disparos de compañeiros en Llanes

Un garda civil de Ferrol asasinou este mércores á súa exparella, outra axente destinada en Llanes (Asturias).

No cuartel do instituto armado desa localidade, o home disparou contra a muller antes de ser abatido polos disparos efectuados polos seus compañeiros para repeler a agresión.

O autor do crime estaba separado do servizo 

Fontes próximas á investigación indicaron a EFE que o agresor, de 49 anos e que tiña expedientes abertos por violencia machista, accedeu ao cuartel pouco antes das 13.30 horas para disparar mortalmente contra a súa exparella, de 50 anos.

No cruzamento de disparos un tenente resultou ferido grave de bala nunha perna, así como o presunto autor dos feitos que, despois de ser atendido polos servizos sanitarios, faleceu na UVI móbil na que estaba a ser evacuado.

As mesmas fontes precisaron que o autor dos feitos recibiu hai uns días a resolución de separación do servizo e que por iso non dispoñía xa da súa arma regulamentaria, polo que consumaría a súa agresión cunha que roubaría ou ben nos armarios do cuartel ou ben  a algún compañeiro.

Matou á muller e na súa fuxida foi disparado por outra axente

O agresor, cuxo último destino foi a Comandancia de Zamora, non entrou ao cuartel pola porta principal, senón por algún outro lugar que el coñecía ao estar destinado alí previamente e, tras achegarse á muller, disparoulle antes de intentar fuxir perseguido por un tenente do corpo, que resultou ferido grave ao recibir un balazo nunha perna.

Tamén un brigada do cuartel intentou repeler a agresión e evitar a fuxida disparando contra o suposto asasino, ao que as feridas recibidas causáronlle a morte posteriormente.

A vítima estaba no sistema VioGén

A axente asasinada, que tiña un fillo de 18 anos e dúas xemelgas de 14 co seu agresor, atopábase no sistema VioGén por denuncias de malos tratos.

A Delegación do Goberno contra a Violencia de Xénero xa anunciou que investiga este caso violencia machista e, de confirmarse como tal, serían 34 mulleres as vítimas mortais da violencia de xénero no que vai de ano, 1.375 desde 2003.

As vítimas da violencia machista e a súa contorna poden pedir axuda en distintos recursos activos todos os días da semana e as 24 horas do día: o teléfono 016, o correo electrónico 016-online@igualdad.gob.es e a canle do WhatsApp no número 600 000 016.

Nunha situación de emerxencia pódese chamar ao 112 ou aos teléfonos de emerxencias da Policía Nacional (091) e da Garda Civil (062) e, se non é posible facer esa chamada, en caso de perigo existe tamén a opción de activar a aplicación ALERTCOPS, que envía un sinal de alerta á Policía con xeolocalización.