Un garda civil mata a súa exparella, tamén axente, no cuartel de LLanes

Unha axente da Garda Civil faleceu este mércores tras recibir disparos da súa exparella, tamén membro do corpo, no cuartel do instituto armado de Llanes, en Asturias, onde o autor resultou ferido grave cando os compañeiros da vítima tentaban repelar a agresión.

O suceso tivo lugar pouco antes das 13:30 horas deste mércores, cando o suposto agresor, destinado na Comandancia de Zamora, entrou na instalación de Llanes e disparou contra a súa exparella, coa que tiña tres fillos, e matouna.

Fontes próximas á investigación indicaron a EFE, que o home, que foi detido, abriu fogo contra ela e contra os compañeiros que intentaron repeler a agresión.

No cruzamento de disparos un tenente resultou ferido grave de bala nunha perna, así como o autor.

A vítima estaba no sistema VioGén

A axente, segundo explicaron a EFE as mesmas fontes, atopábase no sistema VioGén por denuncias de malos tratos.

A Delegación do Goberno contra a Violencia de Xénero xa anunciou que o investiga como un caso de violencia machista.

De confirmarse este caso como un asasinato machista, serían 34 mulleres as vítimas mortais da violencia de xénero no que vai de ano, 1.375 desde 2003.

As vítimas da violencia machista e a súa contorna poden pedir axuda en distintos recursos activos todos os días da semana e as 24 horas do día: o teléfono 016, o correo electrónico 016-online@igualdad.gob.es e a canle do WhatsApp no número 600 000 016.

Nunha situación de emerxencia pódese chamar ao 112 ou aos teléfonos de emerxencias da Policía Nacional (091) e da Garda Civil (062) e, se non é posible facer esa chamada, en caso de perigo existe tamén a opción de activar a aplicación ALERTCOPS, que envía un sinal de alerta á Policía con xeolocalización.