Investigadores da USC avanzan na loita contra o envellecemento infantil
Este grupo de investigador do CIMUS logrou financiamento para os seus estudos por parte da Fundación Mundial que trata esta enfermidade tras os avances realizados
A proxeria é unha enfermidade extremadamente rara que provoca envellecemento na nenez
Hai só douscentos casos en todo o mundo e un deles está en Galicia
Sam Berns morreu o ano pasado, con 18 anos e co aspecto e os problemas de saúde dun centenario. Foron seus pais, pediatras nos Estados Unidos, os que crearon a Fundación Internacional para a Investigación da Proxeria, que agora financia un equipo do Centro de Investigación en Medicina Molecular e Enfermidades Crónicas (CIMUS), da Universidade de Santiago.
Os logros da fundación son importantísimos. Primeiro, coñecer a causa molecular da enfermidade: atopouse a mutación dun xene que se produce ao azar e que provoca esta doenza. Segundo, atopar os tratamentos que están a alongar un pouquiño a calidade e a esperanza de vida destes pacientes.
"Agora comeza a haber interese das farmacéuticas pero ao ser unha enfermidade tan rara a contribución da Fundación foi indispensable para descubrir as causas e que poidamos ter tratamento e esperanza de, algún día, poder curar esta enfermidade", explica o investigador do Cimus, Ricardo Villa.
A contribución deste grupo galego ten que ver coa alimentación, rica en magnesio, que frea a destrución de antioxidantes que provoca a enfermidade.
"Os nenos deixan de medrar, cáelles o pelo e os pais notan que pasa algo raro. Aquí antes era un trauma. Pero agora grazas ao traballo de moitos investigadores podemos dicir mira, tes a mutación xusto no Hutchinson-Gilfford e isto é o que che pasa", di Ricardo Villa.
Unha enfermidade extremadamente rara, 200 casos en todo o mundo, dous en España e un deles diagnosticado no Complexo Hospitalario de Santiago.
