Un coleccionista de insignias atesoura máis de dez mil logo de case trinta anos recompilándoas
Logo dunha viaxe e en vista de que lle caían da mochila decidiu chantalas sobre un corcho, para conservalas e non perdelas
Difícil calcular a cantidade de insignias que ten recompiladas José Rodríguez. Bota contas de que poden rondar as dez mil. Iniciouse a raíz do Camiño de Santiago.
A peza que comezou a colección está relacionada co ano santo compostelán do ano 1993. Daquela eran un agasallo frecuente que se atopaba con facilidade e de cada viaxe que facía traía unhas cantas chapas. Os seus amigos e familiares tamén contribuíron a fomentarlle a afección por coleccionalas.
De tantas que ten hai algunhas poucas insignias repetidas, e a maior parte están sen clasificar. Simplemente están dispostas sobre un corcho.
Cando ten tempo libre dedícase a ordenalas e colgalas. Tenas organizadas por temas: bandeiras, insignias de corporacións, deportistas, medios de transporte...
Unha colección curiosa que non deixa de medrar.
