Un ciberataque dana o sistema de facturación de varios aeroportos europeos
Afectou ás terminais de Bruxelas, Heathrow e Berlín-Brandenburgo
A compañía que presta servizos de facturación e embarque na maioría de aeroportos de Europa, Collins Aerospace, sufriu na noite do venres un ciberataque de orixe descoñecida que está a afectar ás terminais de Bruxelas, Heathrow (Londres) e Berlín-Brandeburgo.
"Houbo un ciberataque na noite do venres, 19 de setembro, contra os sistemas do provedor de servizos de facturación e embarque que afectou a varios aeroportos europeos, incluído o de Bruxelas", advertiu o aeródromo da capital de Bélxica, onde houbo máis de vinte voos afectados.
Debido á incidencia, que obrigou a facer as operacións de check-in e embarque de xeito manual, canceláronse nove voos e outros quince sufriron atrasos dunha hora ou máis, segundo informou o propio aeroporto á prensa bruxelesa.
O aeroporto de Bruxelas, que ten prevista a saída de 35.000 persoas este sábado, aconsella verificar o estado do voo coa aeroliña antes de desprazarse á terminal e só acudir se a viaxe está confirmada.
"Problema técnico"
O aeroporto de Heathrow sinalou que Collins Aerospace tiña un "problema técnico" que podería causar atrasos, polo que recomendou tamén comprobar o estado dos voos.
Do mesmo xeito, a terminal londiniense pediulles aos pasaxeiros de longa distancia comparecer como máximo tres horas antes e ás persoas con viaxes nacionais programadas "cun máximo de dúas".
O ciberataque tamén afectou o aeroporto de Berlín-Brandeburgo, en Alemaña, con demoras e tempos de espera máis longos na facturación e no embarque.
"Debido a un problema técnico cun provedor de sistemas que opera en toda Europa, hai tempos de espera longos no 'check-in'. Estamos a traballar nunha solución rápida", alerta o aeroporto alemán na súa páxina web.
Polo momento, descoñécese a orixe do ciberataque, cuxa autoría non foi proclamada.
