Un ano sen auga potable en Gudín, onde ata os animais lles dan de beber auga mineral
O concello de Xinzo de Limia serve cada quince días garrafas de auga, pero din que non lles chega a nada
Hai moitos veciños que, ante problemas de saúde, xa nin se duchan coa auga da traída
Apuntan á incorrecta xestión dos xurros das granxas como a causa da contaminación
Máis dun ano levan en Gudín, unha aldea do concello de Xinzo de Limia, sen poder empregar a auga da traída para beber, cociñar nin para ducharse. Teñen que mercar litros e litros de auga mineral ata para darlles de beber aos animais. O problema, apuntan, débese a que está contaminada con bacterias polos xurros das numerosas granxas de porcos.
A principios de maio do ano pasado comezaron a sentir que cheiraba mal e tiña un color amarelado. As numerosas analíticas que encargaron amosan efectivamente que a auga non é apta para o consumo pola presenza de varias bacterias perigosas. Algúns veciños apuntan a problemas de pel por ducharse coa auga da traída como as doenzas máis leves.
Ante estes problemas de saúde hai veciños que mesmo xa nin empregan a auga da traída para ducharse e teñen que carrear litros e litros porque as garrafas que lles serve o Concello de Xinzo non son dabondo. O abastecemento xestionábao a comunidade de veciños, pero ante este problema votaron e acordaron por maioría cederlla ao Concello. Aseguran que a causa da contaminación é a pésima xestión dos xurros das numerosas granxas de porco que acaban filtrándose aos acuíferos.
O Concello de Xinzo de Limia aprobou en pleno asumir o abastecemento de auga en Gudín, pero asegura que aínda non pode comezar a tratala porque non ten o permiso de cesión da Confederación Hidrográfica do Miño-Sil. Dende este organismo din que están axilizando os trámites para o cambio de concesión.
