Trump anuncia un acordo sobre Groenlandia coa OTAN e retira a ameaza de aranceis

O presidente estadounidense, Donald Trump, anunciou este mércores un acordo co secretario xeral da OTAN, Mark Rutte, sobre Groenlandia, que será “moi bo para os EUA e todos os países da OTAN”.

Trump suspendeu a ameaza de aranceis a partir do 1 de febreiro contra Europa.

Nunha publicación na súa rede social Truth Social, Trump anunciou así mesmo “conversas adicionais” sobre o sistema de defensa antimísiles “Golden Dome” no que respecta a Groenlandia e engadiu que se facilitaría máis información a medida que avancen as conversas.

“Tras unha reunión moi produtiva que mantiven co secretario xeral da OTAN, establecemos o marco dun futuro acordo con respecto a Groenlandia e, de feito, a toda a rexión ártica. Esta solución, se se leva a cabo, será moi beneficiosa para os Estados Unidos de América e para todos os países da OTAN”, sinalou.

Explicou que, “sobre a base deste entendemento”, non imporá os aranceis que estaba previsto que entrasen en vigor o 1 de febreiro, cos que ameazaba a oito países europeos, entre eles Alemaña, Francia e Dinamarca, que participaron en manobras militares nesa illa ártica.

Precisou que o vicepresidente, JD Vance, o secretario de Estado Marco Rubio e o enviado especial Steve Witkoff, ademais das persoas que sexan necesarias, “encargaranse das negociacións” e “informarano directamente”.

Nas últimas horas, Trump mesmo chegara a referirse de novo a súa intención de comprar Groenlandia, sen ter que usar a forza.