A Audiencia Nacional pide asumir a causa aberta contra o delegado de Goberno en Ceuta

A xuíza da Audiencia Nacional María Tardón pediu asumir a causa aberta nun xulgado de Ceuta contra o delegado do Goberno na cidade autónoma, Miguel Ángel Pérez Triano, pola súa actuación ante a entrada masiva de miles de migrantes desde Marrocos os pasados 30 e 31 de xullo.

A través dunha providencia ditada o pasado venres, Tardón pediu notificar ao Xulgado de Instrución número 6 de Ceuta a apertura da súa investigación e que este valore se é pertinente inhibirse para que a causa do delegado do Goberno se investigue tamén no procedemento aberto na Audiencia Nacional.

Desta forma, Tardón pide asumir o procedemento aberto por mor dunha denuncia de Manos Limpias, á que despois se uniron as demandas interpostas por Vox e Hazte Oír, e que busca esclarecer a xestión feita polo delegado do Goberno ante as entradas masivas.

Este paso conta xa co visto e prace da Fiscalía de Ceuta, que pediu formalmente a inhibición, ao entender que a actuación denunciada contra o delegado do Goberno garda relación directa coa investigación aberta por María Tardón na Audiencia Nacional. 

A investigación penal aberta na Audiencia Nacional busca esclarecer as entradas masivas, nas que a xuíza detecta unha "conduta delituosa presuntamente cometida no estranxeiro que atacou gravemente a integridade territorial de España" cunha "clara e indubidable xestión favorecedora" desde Marrocos.

Os argumentos da xuíza Tardón

No seu auto, a maxistrada apunta que se deben investigar as actuacións adoptadas ante a entrada masiva e alude especificamente á "articulación de adecuados medios de resposta" en relación á información e alertas.

A través desta providencia, pide asumir unha investigación en que os denunciantes atribúen ao delegado do Goberno en Ceuta presuntos delitos de prevaricación, omisión do deber de perseguir delitos, denegación de auxilio e homicidio e lesións por imprudencia grave en comisión por omisión.

Tardón dá este paso despois de pedir a semana pasada ao Ministerio de Presidencia, Xustiza e Relacións coas Cortes copia dos corenta documentos desclasificados polo Goberno que inclúen informes e comunicacións daqueles días.

Entre eses documentos, coñecidos o pasado mércores, figura unha nota informativa de "alerta temperá" do CNI remitida aos servizos de intelixencia marroquís ou conversas coa Delegación do Goberno e a Garda Civil.

Delas despréndese que o CNI alertou a Marrocos e ao Goberno o 29 de xullo, un día antes da entrada masiva de migrantes procedentes de Marrocos en Ceuta, de "posibles intentos de entrada" á cidade autónoma durante a semana da Festa do Trono, que se celebraba o xoves día 30, polos chamamentos en redes sociais que detectou.

Unha das conversas desclasificadas é a que mantivo o CNI o 29 de xullo co entón xefe de gabinete do delegado do Gobierno en Ceuta, ao que informou sobre o chamamento para asaltar a cidade ao día seguinte ou sobre a existencia de dous grupos en redes sociais con 180.000 seguidores, para avisar do "alcance da difusión".

O pasado venres, o que era xefe de gabinete do delegado do Gobierno, Gonzalo Sanz, presentou a súa dimisión tras soster que trasladou os avisos do CNI, a diferenza do que afirmou o seu superior.