Trump alenta agora a Ucraína a recuperar o seu territorio fronte a Rusia

O presidente dos Estados Unidos Donald Trump protagonizou este martes un xiro radical e inesperado ao instar a Ucraína a loitar ata recuperar os territorios ocupados por Rusia, nunha aparente ruptura coa liña de negociacións de paz que promovera ata o de agora.

Trump presentouse ante a Asemblea Xeral da ONU cun discurso sen novidades sobre Ucraína, no que reiterou o seu plan de impoñer sancións a Rusia só se os países europeos deixan de comprar petróleo e gas ruso, algo que só fai un pequeno grupo.

Con todo, tras reunirse de forma bilateral co presidente ucraíno Volodimir Zelenski e coa presidenta da Comisión Europea Ursula von der Leyen, Trump pareceu decidido a romper as pontes con Vladimir Putin.

"(Ucraína) ten un grande espírito, cada vez máis forte. Poderá recuperar o seu país na súa forma orixinal e, quen sabe, quizais mesmo ir máis aló! Putin e Rusia están en graves problemas económicos, e este é o momento para que Ucraína actúe", escribiu na súa plataforma Truth Social.

Ata o de agora, Washington mantiña a postura de que a paz en Ucraína só sería posible se Kíiv aceptaba renunciar a parte dos territorios ocupados.

O presidente estadounidense xustificou esta conclusión sinalando que Rusia leva tres anos e medio loitando sen rumbo nunha guerra que unha auténtica potencia militar debería gañar en menos dunha semana, o cal deixa o Kremlin como un tigre de papel.

Mostrouse ademais convencido de que aumentará a presión interna dentro de Rusia debido ao alto custo que supón a guerra.

Aínda que desexou o mellor a ambos os países, agregou que Estados Unidos continuará fornecendo armas á OTAN para que esta faga o que queira con elas.

Fin das negociacións ou estratexia de presión?

Trump chegou ao poder en xaneiro coa promesa de poñer fin á guerra en Ucraína, un conflito do que culpa constantemente ao seu antecesor Joe Biden.

Inicialmente, liderou un achegamento sen precedentes con Rusia e foi moi crítico con Zelenski, a quen mesmo deixou plantado na Casa Branca en febreiro pasado.

Pero nos últimos meses, despois de que Zelenski aceptase unha tregua, Trump mostrou frustración ante a negativa de Putin de deter os bombardeos, impoñendo varios ultimatos que non tiveron resultados, algo que tampouco logrou durante o cumio que ambos mantiveron en agosto en Alaska.

A pesar deste aparente cambio de postura, podería tratarse dunha nova estratexia de presión por parte de Trump, quen adoita presentarse a si mesmo como un hábil negociador.

Durante unha intervención este martes no Consello de Seguridade da ONU, o secretario de Estado Marco Rubio matizou a situación asegurando que o conflito en Ucraína terminará nas mesas de negociación.

"O presidente (Trump) é un home moi paciente. Está moi comprometido coa paz, pero a súa paciencia non é infinita", declarou Rubio, quen indicou que a Casa Branca segue considerando impoñer novas sancións a Rusia e vender máis armamento ofensivo, non só defensivo, a Ucraína.

Europa celebra o entendemento con Trump

Tanto Ucraína como Europa, que en varios momentos das negociacións de paz sentiron que Trump favorecía a Putin, celebraron este aparente cambio que reflectiría un aliñamento cos seus intereses.

O propio Zelenski afirmou tras reunirse con Trump que discutiron algunhas boas ideas que espera que funcionen e engadiu sen máis detalles: "Espero agora accións concretas dos Estados Unidos para apertar a Rusia cara á paz".

Preguntada pola prensa na entrada do Consello de Seguridade, a alta representante da Unión Europea para Asuntos Exteriores Kaja Kallas cualificou as declaracións de Trump como moi contundentes. "É moi bo que agora teñamos o mesmo entendemento", engadiu.

A falta de reposta oficial do Kremlin, o embaixador adxunto de Rusia ante a ONU Dmtri Polianski declarou ante o Consello de Seguridade que os países europeos viven nunha realidade paralela ao crer que Ucraína está a gañar no campo de batalla.

"Están a volverse cómplices dunha manipulación criminal, cuxo propósito é impedir unha paz xusta, duradeira e a longo prazo en Ucraína".