Alta participación, aglomeracións e ausencia de incidentes na xornada electoral en Chile

Millóns de chilenos achegáronse este domingo en ambiente festivo para participar nas primeiras eleccións presidenciais con voto obrigatorio para todo o censo nacional, incluído preto dun millón de estranxeiros, nunha xornada con calor, longas ringleiras, aglomeracións e ausencia de incidentes reseñables.

Os chilenos escollen o sucesor do progresista Boric entre oito candidatos, coa esquerdista Jara, exministra comunista de Boric, como favorita. As sondaxes indican unha vitoria insuficiente para lograr a presidencia, polo que habería unha segunda volta en decembro.

A incógnita é quen será o seu rival, dáse unha forte disputa entre dous candidatos de ultradereita: o republicano Kast, algo máis moderado, e o libertario Kaiser. As enquisas indican que se as dereitas se unen na segunda volta, Jara, a primeira militante que representa toda a esquerda e todo o centro-esquerda, tería escasas posibilidades de suceder a Boric.

 O actual presidente de Chile, Gabriel Boric, madrugou para votar en Punta Arenas, e co seu bebé en brazos animou a todos a participar nuns comicios que –dixo– son cruciais para o futuro do país.

O actual presidente de Chile, Gabriel Boric, vota no seu colexio electoral de Punta Arenas este domingo

Un total de 15,7 millóns de chilenos están chamados este domingo ás urnas para elixir nunhas presidenciais e lexislativas que se realizan por primeira vez con voto obrigatorio para todo o censo. Todo apunta a que ningún dos oito candidatos presidenciais logrará o 50,01% dos sufraxios necesarios para gañar e deberá celebrarse unha nova votación entre os dous candidatos mais votados o próximo 14 de decembro.

Os chilenos tamén elixen este domingo os senadores en sete rexións e os 155 deputados e deputadas que conforman o Congreso de Deputados.