Topan na Ramallosa o cadáver do home desaparecido en Gondomar
Topan na Ramallosa o cadáver do home desaparecido en Gondomar
O corpo de Albano Manso, de 48 anos, apareceu no esteiro da Foz
O operativo de busca estendérase aos concellos veciños
A baixada da marea deixou ao descuberto o corpo sen vida de Albano Manso preto das tres da tarde. Estaba boca abaixo no esteiro da Foz, onde desemboca o río Miñor na súa viaxe cara ao Atlántico.
Unha veciña alertou os servizos de urxencia. Membros de Protección Civil de Gondomar e dos bombeiros de Nigrán trasladaron o corpo ata o paseo onde foi identificado.
O dispositivo de busca deste veciño de Gondomar, desaparecido hai nove días, estendérase aos municipios lindeiros.
Investigación aberta
O sarxento do posto da Garda Civil de Gondomar, Álvaro Domínguez, está á fronte do caso. A investigación contaba con moitas incógnitas dende un principio.
O home desaparecera o xoves pero un testemuño situouno en Baiona o venres. O seu pai e a súa nai perdéranlle a pista o 19 de xaneiro. Deixáralles a comida feita e despediuse deles.
Só levou o DNI, nin cartos, nin tarxetas nin teléfono móbil. Nestes nove días non houbo movementos nas súas contas bancarias.
Agora ábrese unha nova fase na investigación tras a localización do corpo na Ramallosa, no concello de Nigrán.