Aviso amarelo por temporal na costa e por neve nas montañas de Lugo e Ourense

A borrasca Martinho remite pero aínda deixa inestabilidade no litoral galego. De feito, Meteogalicia activa este domingo o aviso amarelo en toda a costa por ondas que aínda poden superar os cinco metros. 

A xunta mantén informados da situación os municipios afectados, as deputacións, Protección Civil e os clubs náuticos. Do mesmo xeito, a Secretaría Xeral suspende toda a actividade deportiva federada no mar na Mariña e no noroeste da Coruña.

Ademais, alerta de acumulacións de neve superiores aos 5 centímetros nas montañas de Ourense e Lugo. Tamén neste caso, o aviso é amarelo.  A cota, situada nos 800-900 metros pola mañá, irá subindo ata os 1.000 metros pola tarde.

Respecto ás temperaturas, non se producen cambios significativos, con lixeiros descensos das mínimas na metade sur de Galicia. O vento soprará moderado do noroeste con intervalos fortes en mar aberto entre Estaca de Bares e a Mariña Oriental.